نعم للتصويت، لا وألف لا للمقاطعة
دَقَّت ساعة العَمَلْ
للتغيير والافتخار
حتى نجيب أمَلْ
رِخاء واستِقرار
كل مِن مَسؤولية حَمَلْ
لازم يشارك في القَرارْ
لتحقيق حِلْمِ الشَباب
للتَقَدُّم والإِعمار
بِدنا عقول فتّيِّة
خلّاقة وقوِيِّة
تفكر وتستثمر
في كل قَرار
بدنا نِمضي سَوِيِّة
حتى بيتنا نعمِّر
ونحقِّق الانتصار…
كل مين بقدر يْصَوِّت
ييجي بعزم وإصرار
كل مين بقدر يِقنِع
يمشي بهَالمِشوار….
وللي بدو يقاطِع
وحِلم الكارِه يحقق
منقول يا ساتر من الأشرار
اللي بدهن صوتنا يموت
وما يِنسَمَع بهالدِيار…
لااااااا وألف لاااااا
صوتنا عالي وصارِخ
مسموع فوق كل جْدار
وراح مجدنا يِرْفع
على طول الليل والنهار
وصِلْنا لوضِع مُرعِب
زادت فيه الأَشرار
لو يصح لها بتِخفينا
وبتبعدنا من الأَنظار
في عنصرية زاحفة
كلها كُرْهُ واحتِقار
صوت العربي بهالبلاد
بدها تمحيه من الرادار
هذا الجرفِ الزاحِف
إِن وصل لوزارة المَعارِف
لا راح تتعمر مدرسة وْلا دار
كَفَّك ساعتها عالضيعة
واحسن لَكُلنا الفَرار
هل هذا اللي منِرغَبُه؟
من مقاطعة كلها دَمار؟؟
كأنه منِذبح حالنا
ومنولع فينا النار؟؟؟
لاااااا وألفَ لااااااا
مش احنا اللي منقبل الهَزيمة
مش احنا اللي منكتِسي بالعار
راح نزيد من مقاعدنا
ونخَللي اللئيم يِحتار
لاااا وألف لااااا
كلنا عصناديق الاقتراع
راح نصرخ بأعلى صوتنا
بكُل أُذن وفوق كل جْدار
صوتنا العربي ساطع
كالشمس في وضحِ النهار
وراح مَجِدنا يِرْفع
ويِتزَيَّن بإكليلِ الغار…
وسام جورج اسمر
حيفا