بتعرفوا عيد "المنغل"؟ صحيح.. برافووو.. عيد الاستقلال.. هو مش عيد لكنّه يوم الاستقلال.

بلاد العالم بتعيّد استقلالها بالحفلات، بالأفراح، بالاستعراضات العسكريّة، بالطّلعات الجويّة، بالصّواريخ البالستيّة، بالأسلحة الفتاكة، بوسائل الدّمار الشّامل، باستعراض عضلات الجيوش البريّة والبحريّة والجويّة.

وكيف بتعيّد بلادنا باستقلالها؟

كانت الدّولة تعيّد من زمان بالاستعراضات العسكريّة، بالطّلعات الجويّة، بعرض العضلات الإسرائيليّة قدّام الجيوش العربيّة، وتخويفها، وهذا بسموّه الرّدع والدّفاع.

ولكن وقعت حروب حزيران أو الأيام السّتة، تشرين أو أكتوبر أو يوم الغفران، ولبنان الأولى والثّانية والثّالثة والاجتياحات، وحرب العراق وصواريخ صدام.

وبعدها حروب غزّة الأولى والثّانية والثّالثة والرابعة والخامسة و.. و.. و.. و…

وبعدها المقاومات والانتفاضات، والاحتلالات، والجدارات، والمصادرات و.. و.. و..

واليوم العمليّات العسكريّة والمداهمات والاعتقالات، والمصادرات، والسّلب والنّهب و.. و.. و..

واليوم كتابات عنصريّة، وتدفيع الثّمن، وتكسير المقابر، والاعتداءات على المقدّسات، والهدم، وحجز أموال الفلسطينيّين و.. و.. و..

واليوم إيران وذرّتها، وموسكو وصواريخها لإيران، وسوريا وداعش وماعش والنّصرة والكسرة وحطّوا حماس كمان و.. و.. و..

واليوم أوباما.. آه صحيح، أوباما لا تنسوه، وسياستو إللي مش متّفقة مع سياسة نتنياهو.. شو هالمصيبة، إنّو أوباما ما برد على نتنياهو ولا بسمع كلمته و.. و.. و..

وهيك صار الاحتفال بالاستقلال على "المنغل".. و"المنغل" يعني بالعربي المنقل.. والعرب ما حسّوا إلّا اليهود عم بسرقوا لهم المنقل.. فراحوا هم كمان يشووا بالاستقلال.. على المنقل.. على "المنغل".. مش مهم، ما بصير اليهود يوخذوا لنا المنقل ويعملوه "منغل" إلهن، يعني حتّى هذا أخذوه.. مثل ما أخذوا الفلافل والتبولة والحمص والشّتائم والمسبّات..

أنا كنت بقول للعرب لا تشووا على "المنغل" تَنشوف اليهود على إيش بدهم يشووووا..

(أبو إلياس)