قبل ما نحكي عن عنصرية بعض “الإعلاميين”… خلّينا نسأل: مين أعطاهم أصلاً لقب إعلامي؟!
هل اصلا هاي الناس بنفع تكون في ” الاعلام “؟؟!!!!!
قبل ما نناقش إذا تصريحات فلان وعلان عنصرية، حقيرة، مستفزة أو مقرفة، في سؤال أهم وأعمق بكثير: هل هاي الناس أصلاً مؤهلة تكون على الشاشة؟ هل بتصلح تمسك ميكروفون؟ وهل عندها الحد الأدنى من الثقافة والكفاءة والمهنية والأخلاق حتى تحمل لقب “إعلامي” أو “إعلامية”؟!
مش كل واحد طلع من برنامج تلفزيوني أو موسيقي، أو كان لاعب كرة قدم مشهور، أو جمع آلاف المتابعين، صار تلقائياً مؤهل يحمل لقب “إعلامي” ويمسك ميكروفون ويتصدر الشاشات!
ممكن الإنسان مع الوقت يتعلم، يطور حاله، يكتسب الخبرة، ويفهم أصول المهنة وقواعدها وأدواتها. لكن الشهرة لحالها مش شهادة كفاءة، وعدد المتابعين مش مؤهل مهني!
الإعلام مش هواية ولا استعراض ولا مسابقة شعبية. الإعلام مهنة بكل معنى الكلمة، إلها أصول وقواعد وفنون، وبتحتاج لقدرات وآليات وأدوات وخبرة ومهنية، وقبل كل إشي لأخلاقيات ومسؤولية تجاه الناس والمجتمع.
اللي تعلم الإعلام على أصوله، أو اكتسب خبرة مهنية حقيقية، بعرف شو يعني حق الرد، وشو يعني محاورة، وكيف بطرح السؤال، وكيف بحترم الضيف، وبعرف الحدود بين الرأي الشخصي والعمل الإعلامي، وبين المسموح والممنوع.
والكفاءة مش حكر على أصحاب الشهادات الجامعية. في ناس بدون شهادات عندها من الثقافة والتجربة والمهنية والأخلاق ما يفوق أصحاب أعلى الشهادات. لكن في فرق كبير بين إنسان بنى قدراته بالتعلم والتجربة والعمل، وبين إنسان مفكر إن الشهرة لحالها بتعطيه الحق يمارس مهنة ما بعرف أصولها!
إنسان لا عنده مهنية ولا أخلاقيات، وبينه وبين الإعلام جبال، وفجأة صار ماسك ميكروفون، وقاعد على الشاشة، وبوزع علينا جواهره وتحليلاته ومواقفه!
وصلنا لمرحلة بتفوت فيها على مقابلة وبتطلع او بتشوف مقابلة او بتسمعها وانتي مش عارف مين الإعلامي ومين الضيف، مين اللي بسأل ومين اللي بجاوب! وبطلت تعرف إذا اللي قدامك إعلامي، أو سياسي، أو مندوب، أو مبعوث، أو جاي يوصل رسالة لحساب حدا!
اختلط الحابل بالنابل، وصار الإعلام عند البعض تجارة ريتينج وشهرة واستعراض، على حساب المهنية والأخلاق والمسؤولية تجاه المجتمع.
والأصعب إن أصحاب الخبرة والكفاءة والتجربة الحقيقية أحياناً بلاقوا حالهم خارج الشاشات، بينما أصحاب المحتوى الفارغ بتصدروا المشهد!
من إمتى الشهرة صارت كفاءة؟ ومن إمتى الوقاحة صارت جرأة؟ ومن إمتى طول اللسان صار مؤهلاً إعلامياً؟!
اليوم، حتى تسوق سيارة أجرة…يعني سوفير تاكسي وتنقل ركاب، مطلوب منك تستوفي شروط ومعايير مهنية ومسؤولية تجاه الناس. أما عشان تمسك ميكروفون، وتدخل بيوت الملايين، وتؤثر على الرأي العام، وتحاور الناس بقضايا مصيرية، فبكفي تكون مشهور ولسانك طويل؟!
عشان هيك…..
قبل ما ننشغل بتصريحات فلان وعلان، ونحلل قديش فيها عنصرية واستعلاء وانحطاط، لازم نرجع للسؤال الأول والأهم:
هل فلان وعلان أصلاً مؤهلين يكونوا جزءاً من الإعلام؟ ومين قرر إنهم بيستحقوا يتصدروا الشاشات؟
المصيبة مش بس باللي بحكي من وراء الميكروفون، المصيبة كمان باللي سلمه الميكروفون، وبالمعايير اللي حولت التفاهة لشهرة، والشهرة لمهنة، والريتينج لبديل عن الأخلاق! الي اعطاه الفرصة هو المسؤول وهو سبب معاناتنا !!!!
وخسارة على مهنة عظيمة، لما يصير الوصول للشاشة أسهل من امتلاك الحد الأدنى من المسؤولية والأخلاق!
الاعلام…..مهنية واخلاق اولا !!!!
بقلم فاخر بيادسة
